Rritja e çmimeve të biletave të avionit këtë verë ka bërë që shumë udhëtarë të përdorin pikët dhe miljet e grumbulluara nga programet e besnikërisë për të ulur shpenzimet.

Aliera Iheanacho kishte kursyer më shumë se 100 mijë milje ajrore me shpresën për një udhëtim luksoz në klasën e parë, por për shkak të çmimeve të larta të fluturimeve vendosi t’i përdorë ato për një udhëtim në Kinë, ku vizitoi Disneyland në Shangai dhe Hong Kong.

Ekspertët thonë se gjithnjë e më shumë udhëtarë po përdorin pikët e tyre për të përballuar kostot e larta, pasi çmimet e karburantit për avionë dhe kërkesa e madhe për udhëtime kanë ndikuar në rritjen e tarifave.

Sipas analizave të industrisë, edhe numri i kërkimeve për bileta me pikë është rritur ndjeshëm, por ofertat e mira janë bërë më të vështira për t’u gjetur.

Ekspertët këshillojnë udhëtarët të jenë fleksibilë me datat dhe destinacionet, pasi pikët dhe miljet gjithashtu humbin vlerë me kalimin e kohës.