Regjisori i njohur Christopher Nolan ka treguar pse zgjedh t’i lërë disa përfundime të filmave të tij të hapura për interpretim nga publiku.

Në një intervistë për “The Daily Show”, fituesi i çmimit Oscar tha se nuk dëshiron ta përcaktojë vetë përvojën e shikuesve duke dhënë përgjigje të drejtpërdrejta për fundet e paqarta.

Një nga shembujt më të famshëm është filmi “Inception”, ku skena finale me rrotullën që vazhdon të sillet ka lënë fansat në dilemë nëse personazhi i Leonardo DiCaprios ishte kthyer vërtet në realitet apo jo.

Nolan tregoi se pas filmit “Memento” mësoi të mos japë interpretimin e tij personal për fundet e filmave, pasi kjo mund të ndikojë mënyrën se si publiku e përjeton historinë.

Regjisori është i njohur për filmat me histori komplekse dhe përfundime që vazhdojnë të diskutohen edhe shumë vite pas publikimit, si “The Prestige”, “The Dark Knight Rises” dhe “Inception”