Një aplikacion francez i quajtur Yuka po fiton gjithnjë e më shumë përdorues në botë, duke i ndihmuar konsumatorët të zgjedhin produkte më të shëndetshme gjatë blerjeve.

Aplikacioni lejon skanimin e barkodit të produkteve ushqimore, kozmetikës dhe artikujve të higjienës, duke i vlerësuar ato me nota nga 0 deri në 100. Produktet me përbërës të dëmshëm ose me shumë sheqer, yndyrë dhe aditivë marrin vlerësime të ulëta, ndërsa përdoruesve u sugjerohen alternativa më të shëndetshme.

I lançuar në vitin 2015 në Francë, Yuka ka arritur mbi 85 milionë përdorues në 12 shtete, përfshirë SHBA-në, Francën, Mbretërinë e Bashkuar, Kanadanë dhe Australinë.

Sipas kompanisë, një anketë e vitit 2024 tregoi se 94 për qind e përdoruesve e kthejnë produktin në raft kur aplikacioni e vlerëson negativisht. Ndikimi i tij ka bërë që edhe zinxhirë të mëdhenj supermarketesh në Francë të ndryshojnë përbërjen e mijëra produkteve për të përmirësuar vlerësimin e tyre.