Pas ndryshimit të tre përzgjedhësve dhe një serie rezultatesh zhgënjyese, Brazili siguroi kualifikimin në Kupën e Botës 2026, duke e mbyllur fazën kualifikuese të Amerikës së Jugut në vendin e pestë.

Rritja e numrit të skuadrave pjesëmarrëse bëri që brazilianët të mos rrezikonin seriozisht mungesën në turne, por rrugëtimi i tyre nuk ishte aspak bindës. Brazili humbi gjashtë nga 18 ndeshjet e zhvilluara dhe pranoi 17 gola, me vetëm Kolumbinë që kishte një bilanc mbrojtës më të dobët mes skuadrave që siguruan kualifikimin e drejtpërdrejtë.

Megjithatë, ekziston një arsye interesante për optimizëm. Rruga drejt Botërorit 2026 ngjan me atë të vitit 2002, kur Brazili e përfundoi fazën kualifikuese pas Argjentinës dhe Ekuadorit, pa bindur plotësisht. Në fund, ai ekip ngriti trofeun e pestë botëror. Tani mbetet të shihet nëse historia mund të përsëritet pas 24 vitesh.

Çfarë pritet nga Brazili?

Edhe pse nuk konsiderohet favorit absolut, Brazili mbetet një nga pretendentët kryesorë për titullin. Në letër, grupi me Moroku, Skocia dhe Haiti duket i kalueshëm, por sfidat e vërteta pritet të vijnë në fazat eliminatore kundër fuqive evropiane.

Pesha kryesore në repartin ofensiv do të mbështetet te Vinícius Júnior dhe Raphinha. Ndërkohë, mungesa e mbrojtësve të krahut të kalibrit të Cafu, Roberto Carlos, Dani Alves apo Marcelo vazhdon të konsiderohet një pikë e dobët e ekipit.

Në skuadër ndodhet edhe Neymar, i cili, pavarësisht problemeve të vazhdueshme me lëndimet dhe faktit se tashmë është 34 vjeç, synon të japë kontribut në atë që mund të jetë Botërori i fundit i karrierës së tij.

Njeriu në krye

Carlo Ancelotti mbetet një nga trajnerët më të suksesshëm në historinë e futbollit. Ai ka fituar pothuajse çdo trofe madhor me klube si AC Milan, Real Madrid, Bayern Munich, Paris Saint-Germain dhe Chelsea.

Konfederata Braziliane e Futbollit e ndoqi për muaj të tërë përpara se ta emëronte në verën e vitit 2025, duke e bërë trajnerin e parë të huaj në historinë e kombëtares braziliane. Megjithatë, edhe nën drejtimin e tij, Brazili nuk ka qenë gjithmonë bindës dhe disa rezultate zhgënjyese kanë sjellë kritika.

Ylli kryesor

Vinícius Júnior konsiderohet lojtari më i talentuar i skuadrës dhe pasardhësi natyral i Neymarit. Megjithatë, paraqitjet e tij me fanellën e Brazilit nuk kanë qenë në të njëjtin nivel me ato që shfaq rregullisht te Real Madrid.

Ai ka realizuar vetëm nëntë gola në 49 paraqitje me kombëtaren dhe ende nuk ka arritur të bëjë diferencën në ndeshjet ndaj kundërshtarëve më të fortë. Shpresat e Brazilit për t’i dhënë fund pritjes 24-vjeçare për titullin botëror lidhen ngushtë me aftësinë e tij për të shkëlqyer në skenën më të madhe të futbollit.

Lojtari për t’u ndjekur

Igor Thiago mund të jetë arma sekrete e Ancelottit në Kupën e Botës 2026. Sulmuesi zhvilloi një sezon të shkëlqyer me Brentford, duke shënuar 22 gola në kampionat dhe duke tërhequr vëmendjen e futbollit anglez.

Ai e justifikoi menjëherë besimin e trajnerit duke realizuar në fitoren 3-1 ndaj Kroacisë. Me konkurrencën e Matheus Cunha dhe Endrick për pozitën e sulmuesit qendror, Thiago po paraqet një kandidaturë serioze për një vend në formacionin titullar.

Pas 24 vitesh pritje, Brazili synon të rikthehet në majën e futbollit botëror. Pyetja që mbetet është: a do të jetë Botërori 2026 momenti i shumëpritur i “Seleçaos”?