Paga mesatare në Kosovë ka shënuar rritje gjatë vitit 2025, sipas raportit më të fundit të Agjencisë së Statistikave të Kosovës (ASK).

Sipas raportit “Niveli i Pagave në Kosovë, 2025”, paga mesatare bruto ka arritur në 713 euro, krahasuar me 639 euro sa ishte në vitin 2024, duke shënuar një rritje prej 11.6%.

Ndërkohë, paga mesatare neto është rritur nga 552 euro në 636 euro, ose 15.2% më shumë se një vit më parë.

Rritje e pagave është regjistruar në sektorin publik, ndërmarrjet publike dhe sektorin privat. Megjithatë, sektori privat vazhdon të ketë pagat më të ulëta, me një mesatare neto prej 596 euro.

Sipas ASK-së, pagat më të larta në Kosovë gjatë vitit 2025 janë regjistruar në sektorin e “Informimit dhe komunikimit”, me mbi 1 mijë euro neto, ndërsa më të ulëtat në kategorinë “Shërbime të tjera”, me 387 euro neto.