Nëse ke menduar ndonjëherë të jetosh larg zhurmës dhe teknologjisë, një ishull grek mund të jetë opsioni ideal. Ishulli Makri, pjesë e grupit të ishujve në Detin Jon, do të dalë në ankand këtë nëntor me një çmim fillestar prej rreth 247 mijë eurosh.

I njohur për qetësinë dhe izolimin, ishulli ka vetëm disa ndërtesa të braktisura, përfshirë një shtëpi të vogël, një cisternë uji dhe një kishëz.

Megjithatë, blerësit potencialë duhet të kenë parasysh një kufizim të madh: Makri është zonë e mbrojtur dhe pjesë e rrjetit Natura 2000, çka e bën pothuajse të pamundur zhvillimin e madh infrastrukturor apo ndërtimet luksoze.

Në këtë ishull lejohen vetëm ndërtime minimale dhe aktivitete bujqësore, duke e bërë atë ideal për ata që kërkojnë një stil jetese të thjeshtë dhe larg botës digjitale.