NASA do të realizojë këtë javë një manovër të rëndësishme hapësinore, pasi anija kozmike Psyche do të kalojë shumë afër Marsit për të marrë një shtytje graviteti në rrugën drejt asteroidit të rrallë metalik “Psyche”.

Anija pritet të kalojë rreth 4.500 kilometra larg planetit të kuq, ndërsa do të lëvizë me afro 20 mijë kilometra në orë. Gjatë këtij momenti, kamerat dhe instrumentet shkencore do të realizojnë mijëra fotografi dhe matje.

Shkencëtarët besojnë se asteroidi “Psyche” mund të jetë bërthama metalike e një planeti të lashtë të shkatërruar miliarda vite më parë. Studimi i tij mund të ndihmojë në kuptimin e formimit të sistemit diellor dhe origjinës së Tokës.

Misioni u nis në vitin 2023 dhe pritet të arrijë asteroidin në vitin 2029, ku anija do ta studiojë për dy vjet.