Çmimet e naftës në tregjet ndërkombëtare kanë shënuar rritje, pasi planet për një raund të dytë bisedimesh mes Shteteve të Bashkuara dhe Iranit kanë ngecur.

Nafta Brent, si pikë referimi globale, u rrit me afro 2%, duke arritur në 107.26 dollarë për fuçi, ndërsa nafta e tregtuar në SHBA u rrit me rreth 1%, në 95.40 dollarë.

Rritja vjen në një kohë kur tensionet në rajon vazhdojnë të ndikojnë furnizimin global me energji, veçanërisht për shkak të situatës në Ngushticën e Hormuzit, një rrugë kyçe për transportin e rreth një të pestës së naftës dhe gazit natyror në botë.

Ekspertët paralajmërojnë se një mbyllje e zgjatur e kësaj rruge mund të ketë pasoja të gjera në zinxhirin global të furnizimit, duke ndikuar jo vetëm në çmimet e karburanteve, por edhe në produkte të tjera të përditshme.

Ndërkohë, tregtarët e naftës mbeten të kujdesshëm dhe presin zhvillime më konkrete në lidhje me uljen e tensioneve në rajon.