Gjykata Supreme e Filipineve ka marrë një vendim historik, duke vendosur që çiftet e së njëjtës gjini mund të njihen ligjërisht si bashkëpronarë të pasurisë, nëse vërtetohet se të dy partnerët kanë kontribuar në blerjen ose renovimin e saj.

Për herë të parë, gjykata ka aplikuar Nenin 148 të Kodit Familjar, i cili rregullon marrëdhëniet pronësore të personave që bashkëjetojnë, por nuk mund të martohen ligjërisht. Gjykata theksoi se ky nen nuk diskriminon mbi bazë gjinore dhe zbatohet për të gjitha format e bashkëjetesës.

Rasti kishte të bënte me një çift të së njëjtës gjini, dy gra, të cilat kishin konflikt mbi shitjen e një shtëpie në periferi të Manilës. Ndërsa gjykatat më të ulëta kishin refuzuar kërkesën për ndarjen e pasurisë, Gjykata Supreme e përmbysi vendimin, duke u bazuar në prova që tregonin kontribut të barabartë financiar.

Në vendimin e saj, gjykata bëri thirrje edhe për institucionet dhe ligjvënësit, që të adresojnë nevojat ligjore të çifteve të së njëjtës gjini, të cilat aktualisht mbesin pa mbrojtje të plotë ligjore në Filipine.

Ky vendim konsiderohet një hap i rëndësishëm drejt njohjes së të drejtave pronësore të komunitetit LGBT në një nga shoqëritë më konservatore në botë.