Filmi psikologjik “The Housemaid” ka arritur një sukses të jashtëzakonshëm në kinematë botërore, duke kaluar shifrën prej 300 milionë dollarësh në fitime globale. Prodhimi i Lionsgate ka arkëtuar 116 milionë dollarë në tregun amerikan dhe 189.1 milionë dollarë ndërkombëtarisht, duke e çuar totalin në 305 milionë dollarë.

Me një buxhet prej vetëm 35 milionë dollarësh, filmi konsiderohet një fitore e madhe financiare për studion. I publikuar pak para Krishtlindjeve, “The Housemaid” arriti të mbetet tërheqës për publikun edhe gjatë muajve të parë të vitit, falë vlerësimeve pozitive dhe interesimit të vazhdueshëm të shikuesve.

I regjisuar nga Paul Feig dhe i bazuar në romanin bestseller të Freida McFadden, filmi ndjek historinë e një gruaje me të kaluar misterioze që punësohet si shërbyese në një familje shumë të pasur, ku asgjë nuk është ashtu siç duket. Pas këtij suksesi, tashmë është konfirmuar se vazhdimi i filmit, “The Housemaid’s Secret”, është në zhvillim.