Komisioni Evropian ka ndarë 171 milionë euro për zhvillimin e infrastrukturës dhe mbështetjen e sektorit privat në Ballkanin Perëndimor, mirëpo Kosova nuk do të përfitojë nga këto fonde.

Sipas Komisionit Evropian, Kosova nuk i ka përmbushur ende kushtet ligjore, pasi nuk ka ratifikuar Marrëveshjen e Kredisë dhe Fondeve në kuadër të Instrumentit për Reforma dhe Rritje. Zëdhënësi i KE-së, Guillaume Mercier, ka konfirmuar për Radion Evropa e Lirë se për këtë arsye Kosova nuk mund të përfitojë nga fondet e këtij instrumenti.

Nga totali i fondeve, 94.7 milionë euro janë ndarë për investime infrastrukturore, 76.3 milionë euro për sektorin privat, ndërsa 2.9 milionë euro për asistencë teknike në Shqipëri dhe Bosnje e Hercegovinë. Paketa e mbështetjes përfshin fonde nga disa mekanizma të Bashkimit Evropian, përfshirë IPA-n, Kornizën e Investimeve për Ballkanin Perëndimor dhe Instrumentin për Reforma dhe Rritje.