Perceptimi i shqiptarëve për gjendjen e tyre financiare është përkeqësuar ndjeshëm gjatë vitit 2025, sipas të dhënave të publikuara nga Barometri i Ballkanit.

Sipas anketimit, 53 për qind e të pyeturve në Shqipëri presin që situata financiare në 12 muajt e ardhshëm të jetë “më keq” ose “shumë më keq”, duke e bërë pesimizmin qëndrimin dominues. Vetëm 46 për qind deklarojnë se gjendja është përmirësuar, ndërsa një përqindje e vogël mendon se ka mbetur e pandryshuar.

Krahasuar me vitin 2024, ndryshimi është i theksuar. Një vit më parë, vetëm 14 për qind shprehnin pakënaqësi, ndërsa shumica prisnin stabilitet ose përmirësim të kushteve financiare.

Ekspertët e lidhin këtë kthesë me rritjen e vazhdueshme të kostos së jetesës, çmimet e larta të ushqimeve, energjisë dhe shërbimeve bazë, të cilat kanë ulur fuqinë blerëse të pagave dhe pensioneve. Edhe pse inflacioni është zbutur në nivel zyrtar, kjo nuk është reflektuar në lehtësim real të shpenzimeve mujore për familjet.

Faktorë shtesë mbeten pasiguria në tregun e punës, veçanërisht për të rinjtë, mospërputhja mes rritjes ekonomike dhe të ardhurave reale, si dhe rritja e emigrimit, që e thellon krahasimin me standardin e jetesës në vendet e Bashkimit Evropian.

Ndryshe nga klima e stabilitetit që dominonte në vitin 2024, viti 2025 shënon një kthesë të fortë drejt pakënaqësisë, duke e renditur Shqipërinë ndër vendet e rajonit me rritjen më të madhe të perceptimit negativ për të ardhmen ekonomike.