Aktori Daniel Stern, i njohur për rolin e Marv në filmin legjendar “Home Alone”, ka bërë të ditur se nuk do të marrë pjesë në aktivitetet që shënojnë 35-vjetorin e daljes së filmit, pavarësisht popullaritetit të vazhdueshëm të tij.

Stern ka shpjeguar se prej vitesh ka lënë pas jetën e Hollywoodit dhe sot jeton një realitet shumë më të qetë si artist dhe fermer në Kaliforni, duke e përshkruar veten si një “djalë të vërtetë shtëpie”.

“Nuk do të largohem nga ferma ime”, ka thënë ai me humor, duke theksuar se kjo nuk përbën fyerje për filmin, por është thjesht zgjedhje personale për një jetë më të tërhequr.

Sipas Stern, ai është gjithmonë i gatshëm për një bisedë telefonike apo një lidhje në Zoom, por jo për udhëtime apo paraqitje publike. Aktori 68-vjeçar mbetet i vetëdijshëm për dashurinë e madhe që publiku vazhdon të ketë për “Home Alone” edhe 35 vite pas premierës së tij më 1990, por thotë se tanimë është më i lumtur ta shijojë suksesin nga distanca dhe në qetësinë e jetës së tij private.