Trafiku Urban i rikthehet punës pas grevës njëjavore

Vendi | 03.12.2025 Ora 7:43

Trafiku Urban ka rifilluar punën nga sot, pas ndërprerjes njëjavore të shërbimit për shkak të mungesës së mjeteve financiare. Pas alokimit të fondeve nga Ministria e Financave dhe pagesës së faturave nga Komuna e Prishtinës, ndërmarrja ka konfirmuar se transporti publik po rikthehet në funksion të plotë.

Gjatë ditëve të grevës, punëtorët e Trafikut Urban dhe transportuesit privat protestuan para Komunës së Prishtinës. Të enjten, Kuvendi Komunal mbajti mbledhje të jashtëzakonshme për të miratuar bartjen e të hyrave vetanake, duke i hapur rrugë pagesës së borxheve. Ministria e Financave ka alokuar sot 2.7 milionë euro për këtë qëllim.