Me fillimin e sezonit të verës, festivale të shumta muzikore në SHBA dhe më gjerë po përballen me një krizë të vërtetë. Më shumë se 40 festivale janë anuluar vetëm këtë vit, përfshirë emra të njohur si Pitchfork Music Festival në Chicago, Music Midtown në Atlanta dhe Kickoff Jam në Florida. Edhe festivale të mëdha si Made in America i Jay-Z apo Firefly Music Festival nuk janë rikthyer që prej vitit 2022.

Kjo situatë shfaqet si pasojë e një sërë faktorësh. Disa fajësojnë ndryshimin e shijeve muzikore, të tjerë theksojnë mungesën e kuriozitetit tek brezat e rinj – përse të paguash për të parë artistë që nuk i njeh, kur mund të zgjedhësh një koncert të madh të një ylli të popit? Ndërkohë, rritja e çmimeve të biletave, kostot e organizimit dhe konkurrenca me turnet e mëdha të artistëve kanë bërë që festivale të mëdha si Coachella të mos shiten më si dikur. Edhe festivale të tjera si Electric Forest kanë raportuar rënie të shitjeve dhe sfida të mëdha logjistike.

Ekspertët theksojnë se festivale të tilla, dikur qendra të risive muzikore dhe eksperiencave unike, po e humbasin atë identitet – duke u bërë më të komercializuara dhe më të fokusuara në artistë mainstream, gjë që po largon publikun që kërkon diçka të freskët dhe të veçantë. Megjithatë, festivale të vogla që ofrojnë përvoja më të thelluara – si Deep Tropics në Nashville – po e gjejnë rrugën e tyre, duke përfshirë aktivitete si punëtori, yoga dhe përkushtim ndaj qëndrueshmërisë.

E ardhmja e festivaleve muzikore mbetet e pasigurt, por është e qartë që industria ka nevojë për një rikonceptim – nga përvoja e publikut e deri te lloji i artistëve që ofron. Ndërkohë, ndërsa koncertet e mëdha vazhdojnë të mbushin stadiumet, festivaleve u duhet të gjejnë mënyra të reja për të tërhequr publikun dhe për të mbijetuar në një treg gjithnjë e më sfidues.