Marka e bukurisë rhode, e themeluar nga Hailey Bieber në vitin 2022, është shitur për 1 miliard dollarë te gjiganti i kozmetikës e.l.f. Beauty. Kjo është blerja më e madhe që e.l.f. ka bërë ndonjëherë, duke kaluar blerjen e saj të mëparshme të markës së kujdesit për lëkurën Naturium për 355 milionë dollarë në vitin 2023.

Rhode ka arritur të gjenerojë 212 milionë dollarë në shitje neto në vitin fiskal të fundit, që përfundoi në mars. Këtë vit, kompania njoftoi gjithashtu se produktet e saj do të jenë të disponueshme në dyqanet Sephora në Amerikën e Veriut dhe Mbretërinë e Bashkuar.

Hailey Bieber do të vazhdojë të jetë një figurë kyçe në kompani, duke shërbyer si drejtoreshë kreative dhe e inovacionit. Sipas e.l.f., rhode ka një model të fuqishëm angazhimi, kryesisht falë pranisë së madhe të Hailey-t në rrjetet sociale dhe popullaritetit të saj si figurë publike. Produktet e rhode shpesh shiten brenda pak minutave dhe fansat presin me orë të tëra për të marrë pjesë në eventet pop-up të markës.

Blerja e rhode përfshin 800 milionë dollarë në para dhe aksione, dhe një mundësi për një pagesë shtesë prej 200 milionë dollarësh, në varësi të performancës së markës në tre vitet e ardhshme. Marrëveshja pritet të finalizohet më vonë këtë vit.

Ndërkohë, e.l.f. Beauty ka njoftuar rritjen e çmimeve me 1 dollarë për të gjithë portofolin e saj nga 1 gushti, si përgjigje ndaj tarifave të reja të vendosura nga SHBA mbi importet nga Kina. Pavarësisht këtyre sfidave, kompania thotë se mbetet e përkushtuar ndaj zinxhirit të saj të furnizimit me bazë në Kinë, që e cilëson si një përparësi strategjike të ndërtuar gjatë 21 viteve të fundit.