Apple ka konfirmuar se konferenca vjetore e zhvilluesve, WWDC 2025, do të mbahet më 9 qershor – dhe një nga momentet më të shumëpritura është prezantimi i iOS 19. Ky version i ri i sistemit operativ pritet të sjellë ndryshimin më të madh vizual që nga iOS 7.

Ndër risitë estetike përmenden një ndërfaqe moderne e frymëzuar nga visionOS, me elemente të tejdukshëm, ikona të rrumbullakëta dhe një shirit navigimi “floating” në aplikacionet e brendshme të Apple.

iOS 19 do të jetë i disponueshëm për një gamë të gjerë pajisjesh, duke filluar nga iPhone 11 dhe të gjitha modelet më të reja, përfshirë edhe serinë iPhone 16 dhe gjeneratat e dytë dhe të tretë të iPhone SE.

Përveç dizajnit të ri, ky përditësim sjell edhe funksione të avancuara, përfshirë mesazhe RCS të enkriptuara nga fundi në fund, përkthim të të folurit në kohë reale përmes AirPods dhe një version të përmirësuar të aplikacionit Health, që përdor inteligjencë artificiale për të ofruar analiza të personalizuara dhe trajnime me video.

Me dizajn të rifreskuar, funksione të mençura për mirëqenie dhe përmirësim në komunikim, iOS 19 po konsiderohet si një nga përditësimet më të rëndësishme të Apple në vitet e fundit.