Seriali i dashur për fëmijë “Sesame Street” do të transmetohet në Netflix më vonë gjatë këtij viti, pas përfundimit të marrëveshjes së mëparshme me HBO Max. Lajmi është konfirmuar nga vetë Netflix dhe Sesame Workshop, organizata që qëndron pas këtij programi edukativ që ka shoqëruar breza të tërë për më shumë se 50 vjet.

Sipas njoftimit zyrtar, sezoni i 56-të i “Sesame Street” do të vijë me një format të ri, ku çdo episod do të fokusohet në një histori 11-minutëshe, e shoqëruar me segmente të rikthyera si “Elmo’s World” dhe “Cookie Monster’s Foodie Truck”. Përveç këtij sezoni të ri, Netflix do të ofrojë edhe 90 orë përmbajtje të mëparshme, duke e bërë këtë marrëveshje një mundësi të madhe për adhuruesit e programit në mbarë botën.

Ndërkohë që programi zhvendoset në një platformë të re digjitale, ai do të vazhdojë të transmetohet falas në rrjetin publik PBS në SHBA, duke siguruar qasje për të gjitha familjet.

Presidentja e PBS, Paula Kerger, theksoi rëndësinë e këtij programi për edukimin e fëmijëve në SHBA, ndërsa Sherrie Rollins Westin nga Sesame Workshop e vlerësoi partneritetin me Netflix si një mundësi për të bashkuar përmbajtjen edukative me shtrirjen globale të platformës.

Netflix e konfirmoi lajmin në mënyrë kreative, me një video ku Cookie Monster "ha" logon e Netflix-it, duke e shoqëruar me frazën: “N IS FOR NETFLIX!”