FIFA ka vendosur zyrtarisht që Kupa e Botës për femra do të zgjerohet nga 32 në 48 ekipe duke filluar nga viti 2031. Ky vendim e vendos turneun në të njëjtin nivel me versionin e meshkujve, që gjithashtu do të zgjerohet në 48 ekipe për edicionin e vitit 2026.

Formati i ri do të përfshijë 12 grupe dhe gjithsej 104 ndeshje, krahasuar me 64 sa janë aktualisht. Turneu do të zgjasë një javë më shumë për të akomoduar këtë zgjerim.

Presidenti i FIFA-s, Gianni Infantino, tha se ky hap përtej rritjes së numrit të ekipeve, është një përpjekje për të përfshirë më shumë shtete në zhvillimin e futbollit të femrave në nivel global.

Shtetet e Bashkuara të Amerikës janë favoritët kryesorë për të pritur edicionin e vitit 2031, ndërsa Mbretëria e Bashkuar mund të mirëpresë Kupën e Botës në vitin 2035.

Gjithashtu, FIFA njoftoi krijimin e një ekipi të refugjateve për femrat afgane, si pjesë e një strategjie të re për të mbështetur të drejtën e vajzave për të luajtur futboll, përkundër ndalimeve në vendin e tyre nga regjimi i talebanëve.