Pas një viti nga dorëheqja e Akio Toyoda, Toyota vijon të mos i përkushtohet plotësisht makinave elektrike, duke zgjedhur në vend të tyre hibridet — një strategji që po jep rezultate mbresëlënëse.

Edhe pse një vit më parë, Akio Toyoda pranoi publikisht se ishte i papërshtatshëm për të drejtuar kompaninë drejt së ardhmes elektrike, Toyota nuk ka ndryshuar qasje. Kompania po vazhdon të investojë fuqishëm në makina hibride, pavarësisht se ato lëshojnë më shumë ndotje krahasuar me makinat elektrike (EV).

Ekspertët thonë se kjo nuk është një mungesë vizioni, por një strategji e qëllimshme për t’u përgjigjur kërkesave reale të konsumatorëve, të cilët përballen ende me sfida si çmimi i lartë i EV-ve, autonomia e kufizuar dhe mungesa e infrastrukturës së karikimit.

Një strategji që po jep fryte

Rezultatet janë të qarta: Toyota shiti 11.2 milionë makina në vitin 2023, më shumë se çdo prodhues tjetër në botë. Një e treta e tyre ishin hibride, ndërsa më pak se 1% ishin EV.

Sipas një analize nga InfluenceMap, Toyota ka lobuar fuqishëm për të ruajtur hibridet në qarkullim, duke kundërshtuar politikat që favorizojnë vetëm makinat elektrike në tregje kyçe si SHBA, Kanada dhe Britania e Madhe.

Makina elektrike vs. hibride: Cili ndot më pak?

Ndërsa EV-të janë më ndotëse për t’u prodhuar për shkak të baterive të mëdha, ato kompesojnë në periudhën afatgjatë duke lëshuar deri në 40% më pak emetime gjatë përdorimit. Në krahasim, hibridet ndotin rreth 17% më shumë se EV-të përgjatë ciklit të tyre jetësor.

Megjithatë, disa modele hibride plug-in si Toyota Prius Prime SE janë ndër më të pastërtat në rrugë, falë efikasitetit dhe dizajnit aerodinamik.

Lufta për të ardhmen e transportit

Toyota po pozicionohet si kampione e zgjidhjeve hibride për një të ardhme më të përballueshme për konsumatorët, ndërsa EV-të mbeten ende të shtrenjta për shumëkënd. Ekspertët si Sam Abuelsamid theksojnë se për momentin, më shumë ndikim ndaj klimës mund të arrihet duke shtuar përdorimin e hibrideve sesa duke pritur që EV-të të bëhen ekonomikisht të qasshme për të gjithë.

Ndikimi i gjeografisë në ndotje

Përdorimi i EV-ve mbetet më i pastër në vende me energji të ripërtëritshme. Në Kaliforni, një EV është pesë herë më pak ndotës se një hibrid. Ndërsa në shtete si Virxhinia Perëndimore, ku energjia vjen kryesisht nga qymyri, diferenca në ndotje është minimale.

Toyota nën kritika për vonesën në tranzicion

Përkundër pretendimeve për mbështetje ndaj uljes së karbonit, Toyota po kritikohet për vonesa në tranzicionin drejt elektrifikimit. Sipas InfluenceMap, kompania renditet ndër 10 kompanitë më influente që pengojnë politikat klimatike globale.

Me vendime që pritet të ndikojnë drejtpërdrejt në të ardhmen e industrisë automobilistike dhe në përballjen me krizën klimatike, strategjia e Toyotës vazhdon të jetë objekt debati mes inovacionit dhe realitetit tregtar.