Një gjykatë në Paris ka vendosur që Kim Kardashian të marrë vetëm 1 euro dëmshpërblim për grabitjen e armatosur që iu bë në kryeqytetin francez në vitin 2016. Kjo ishte pikërisht shuma që Kardashian kishte kërkuar.

Gjykata kishte shpallur fajtorë vitin e kaluar tetë persona për përfshirjen në grabitjen e bizhuterive të yllit amerikan. Kardashian e kishte përshkruar ngjarjen si “përvojën më të frikshme të jetës së saj”.

Në vitin 2016, dy persona të veshur si policë hynë në dhomën e saj në hotel, e lidhën me lidhëse plastike dhe shirit ngjitës dhe i morën bizhuteri me vlerë mbi 6 milionë dollarë, përfshirë një unazë diamanti.

Për shkak të moshës së tyre, autorët u pagëzuan në Francë me nofkën “les papys braqueurs”, ose “grabitësit gjyshër”. Gjashtë prej tyre ishin në të 60-at dhe 70-at kur u gjykuan.

Gjykata vendosi gjithashtu një dëmshpërblim prej 109,516 eurosh për një ish-punonjës të hotelit, i cili kishte kërkuar 550 mijë euro, si dhe 50 mijë euro për hotelin. Stilistja e Kardashian, Simone Harouche, e cila ishte e pranishme gjatë grabitjes, mori gjithashtu 1 euro.

Pas vendimit, Kardashian dhe Harouche thanë se çështja nuk kishte të bënte me shumën e parave, por me përgjegjësinë dhe njohjen e dëmit të shkaktuar.

“Përvoja ishte thellësisht traumatike dhe ndikimi i saj ka mbetur me ne”, thanë ato, duke shprehur mirënjohje për sistemin francez të drejtësisë.