Charles Spencer, vëllai i të ndjerës Princeshë Diana, ka pretenduar në kujtimet e tij të ardhshme se Mbreti Charles, disa ditë pas vdekjes së saj, i kishte thënë: “Do ta harrojmë së shpejti”.

Sipas një pjese të librit, të publikuar nga Daily Mail, deklarata është bërë gjatë një bisede telefonike mes Spencerit dhe atëherë Princit të Uellsit, pas një mosmarrëveshjeje rreth pjesëmarrjes së Princave William dhe Harry në kortezhin mortor të nënës së tyre.

Spencer ka shkruar se Charles reagoi me zemërim, duke pretenduar se ai shprehu edhe përçmim të akumuluar ndaj Dianës dhe habi për ndikimin e madh që vdekja e saj pati te publiku.

Princesha Diana vdiq në gusht të vitit 1997, pas plagëve të marra në një aksident automobilistik në Paris. Djemtë e saj, William dhe Harry, atëherë 15 dhe 12 vjeç, morën pjesë në kortezhin mortor.

Pallati Buckingham ka kundërshtuar pretendimet. Në një deklaratë, zëdhënësi i Mbretit ka thënë se dhimbja e humbjes së një vëllai ose motre mund të ndikojë në gjykim dhe në mënyrën se si kujtohen ngjarjet, edhe shumë vite më vonë.

Libri me kujtimet e Charles Spencer, Swan Song, pritet të publikohet javën e ardhshme. CNN ka bërë të ditur se nuk e ka parë librin, ndërsa botuesi Penguin Random House ka konfirmuar saktësinë e pjesëve të cituara.