Një grua e akuzuar për të shtënë rreth 20 herë me një pushkë gjysmë-automatike drejt portës së shtëpisë së Rihanna në Los Angeles është deklaruar e pafajshme në gjykatë.

Ivanna Lisette Ortiz u paraqit të mërkurën për të dhënë deklarimin e saj, ndërsa përballet me akuza të rënda, përfshirë tentativë vrasjeje dhe disa akuza për sulm me armë zjarri.

Në momentin e të shtënave, në pronë ndodheshin këngëtarja, partneri i saj A$AP Rocky, tre fëmijët e tyre dhe nëna e saj, por fatmirësisht nuk pati të lënduar.

Sipas prokurorisë, sulmi ishte i qëllimshëm dhe i planifikuar, pasi e dyshuara kishte me vete armë, municion dhe madje edhe një paruke për t’u maskuar.

Ngjarja ndodhi më 8 mars, kur dëshmitarët panë një makinë Tesla të bardhë duke u larguar nga vendi i ngjarjes. Policia arriti ta lokalizojë shpejt automjetin dhe të arrestojë Ortiz.

Hetimet zbuluan disa vrima plumbash në portat dhe gardhin e shtëpisë, ndërsa e dyshuara dyshohet se kishte bërë edhe postime kërcënuese ndaj Rihanna-s në rrjete sociale para sulmit.

Nëse shpallet fajtore, Ortiz rrezikon dënim të përjetshëm me burg.