Studimet e fundit tregojnë se menaxhimi i peshës trupore nuk varet vetëm nga numri i kalorive të konsumuara, por edhe nga koha dhe mënyra se si ushqehemi.

Sipas ekspertëve të ushqyerjes, faktorë si orari i vakteve, shpejtësia e të ngrënit dhe përtypja e ushqimit ndikojnë drejtpërdrejt në mënyrën se si trupi përthith dhe përpunon kaloritë.

Hulumtimet kanë treguar se personat që konsumojnë pjesën më të madhe të kalorive më herët gjatë ditës kanë më shumë gjasa të humbin peshë, krahasuar me ata që hanë më shumë në mbrëmje, edhe kur sasia totale e kalorive është e njëjtë.

Gjithashtu, ngrënia e shpejtë lidhet me konsum më të lartë kalorik dhe rritje të nivelit të sheqerit në gjak, ndërsa ngrënia më e ngadaltë ndihmon në ndjesinë e ngopjes dhe redukton marrjen e ushqimit.

Një rol të rëndësishëm luan edhe përtypja dhe struktura e ushqimit, pasi ato ndikojnë në sasinë e kalorive që trupi përthith.

Ekspertët theksojnë se përveç dietës, zakonet e të ushqyerit dhe reagimet individuale të organizmit janë faktorë kyç në ruajtjen e një peshe të shëndetshme.