Ngrohja globale po shkrij akujt e Arktikut dhe po hap rrugë detare që më parë ishin të papërdorshme. Trafiku i anijeve, përfshirë anijet tregtare, peshkimorë dhe linjat turistike, është rritur ndjeshëm, por kjo ka një kosto të madhe mjedisore: emetimet e karbonit të zi, i cili përshpejton shkrirjen e akullit dhe ndikon në motin global.

Midis viteve 2013 dhe 2023, numri i anijeve në veri të paralelit 60 është rritur 37%, ndërsa distanca totale e përshkuar nga këto anije është rritur 111%, sipas Këshillit Arktik. Emetimet e karbonit të zi nga anijet janë rritur gjithashtu, me peshkimorët si burimi kryesor.

Disa vende, përfshirë Francën, Gjermaninë, Ishujt Solomon dhe Danimarkën, kanë propozuar që Organizata Ndërkombëtare e Detarisë të kërkojë përdorimin e “karburanteve polare” – më të pastra dhe me më pak ndotje – për të gjitha anijet që lundrojnë mbi paralelin 60. Por interesat ekonomike dhe politike, si industria e peshkimit dhe përfitimet nga transporti më i shpejtë midis Azisë dhe Europës, po pengojnë zbatimin e rregullave.

Ekspertët paralajmërojnë se nëse nuk merren masa për të reduktuar ndotjen me karbon të zi, Arktiku mund të shndërrohet në rajonin më të ngrohtë të Tokës, duke shkaktuar pasoja për motin dhe klimën globale.