Grupi legjendar britanik The Cure ka fituar dy çmime Grammy për herë të parë në karrierën e tyre, pas lansimit të albumit comeback Songs of a Lost World. Ceremonia u zhvillua dje të dielën më 01.02.26 në Crypto.com Arena në Los Angeles.

Albumi u shpall Best Alternative Music Album, ndërsa singli Alone mori çmimin Best Alternative Music Performance. Për fat të keq, anëtarët e grupit – Robert Smith, Simon Gallup, Roger O'Donnell, Jason Cooper dhe Reeves Gabrels – nuk mund të merrnin pjesë personalisht, pasi ishin në funeralin e gitaristit dhe keyboardistit të tyre të gjatë, Perry Bamonte, i cili ndërroi jetë në dhjetor në moshën 65 vjeçare.

Në një fjalim të lexuar në skenë, Smith falënderoi Grammys dhe të gjithë ata që kontribuuan në album, duke përfshirë bashkëprodhuesin Paul Corkett, ekipin e Universal Music Group, stafin dhe, më e rëndësishmja, fansat e The Cure në mbarë botën: “Pa ju, asgjë nga kjo nuk do të ishte e mundur. Faleminderit!”