Netflix ka lënë të kuptohet se sezoni i tretë i serialit japonez fantastiko-shkencor “Alice in Borderland” do të jetë i fundit, edhe pse ende nuk ka një konfirmim zyrtar për përfundimin e tij.

Seriali, i cili u shfaq për herë të parë në dhjetor 2020 dhe fitoi popullaritet global, bazohet në mangën e botuar nga viti 2010 deri në 2016 me gjithsej 18 vëllime. Ai ndjek historinë e një lojtari të apasionuar pas video-lojërave që, bashkë me miqtë e tij, detyrohet të marrë pjesë në lojëra vdekjeprurëse për mbijetesë në një Tokio të zbrazët dhe të çuditshme.

Sipas raportit të Netflix-it, sezoni i tretë ka regjistruar rreth 25 milionë shikime dhe është përshkruar si përmbyllës. Fansat në rrjetin social X pretendojnë se seriali ishte planifikuar që në fillim të mbyllej me sezonin e tretë, pasi historia arrin fundin e mangës origjinale.
Në serial luajnë aktorë të njohur japonezë si Kento Yamazaki, Tao Tsuchiya dhe Nijiro Murakami, ndërsa shpesh krahasohet me hitin koreano-jugor të Netflix-it, “Squid Game”, për temat e garave të dhunshme, tradhtinë dhe sakrificat, ndonëse “Alice in Borderland” është më i orientuar drejt fantashkencës.