Qeveria indiane ka kërkuar nga platformat e tregtisë elektronike që të ndalojnë shërbimet e dërgesave brenda 10 minutash, një model që kishte fituar popullaritet të madh në qytetet kryesore të vendit.

Ky vendim pason një grevë të madhe të rreth 200 mijë punëtorëve të shpërndarjes në prag të Vitit të Ri, të cilët kërkuan paga minimale, kushte më të sigurta pune dhe transparencë në llogaritjen e të ardhurave dhe vlerësimeve algoritmike.

Platformat si Zomato, Swiggy dhe Blinkit argumentojnë se rregullimi i tepërt mund të dëmtojë një industri që është ndër segmentet me rritjen më të shpejtë të tregut të punës në Indi. Aktualisht, ekonomia “gig” numëron rreth 12 milionë punëtorë dhe pritet të arrijë në 24 milionë deri në fund të dekadës.

Megjithatë, kritikët theksojnë se modeli i dërgesave ultra të shpejta ushtron presion të madh mbi punëtorët, duke rritur rrezikun në trafik dhe duke fshehur kosto sociale që bien mbi ta.

Ndërkohë, qeveria po përgatitet të zbatojë rregulla të reja që për herë të parë përfshijnë punëtorët “gig” në ligjet e punës, duke garantuar sigurim dhe mbrojtje sociale bazë. Debati mbetet i hapur, ndërsa pritet që ndryshimet të ndikojnë edhe në çmimet dhe shpejtësinë e shërbimeve për konsumatorët.