Christopher Nolan ka ndërmarrë një hap të pazakontë në promovimin e filmit të tij të ri, The Odyssey, duke nxjerrë në shitje biletat për disa shfaqje një vit para publikimit zyrtar të filmit, i planifikuar për 17 korrik.

Biletat u ofruan për shfaqjet e hapjes në formatin Imax 70mm, një teknologji që Nolan e konsideron thelbësore për përvojën kinematografike. Interesi ishte i menjëhershëm, me shumicën e biletave të shitura brenda 24 orëve dhe rishitje online me çmime shumë më të larta.

Filmi, i bazuar në Odisea-n e Homerit, sjell një kast të gjerë aktorësh të njohur, përfshirë Matt Damon, Zendaya, Tom Holland dhe Lupita Nyong’o, duke e kthyer projektin në një nga premierat më të pritura të vitit.

Ekspertët e industrisë e shohin këtë strategji si përpjekje për ta kthyer shikimin e filmit në kinema në një “event”, në një kohë kur të ardhurat nga biletat kanë rënë dhe konkurrenca me platformat streaming është rritur ndjeshëm. Megjithatë, ka edhe skepticizëm nëse kjo qasje mund të funksionojë për filma të tjerë, duke qenë se formati Imax 70mm është i kufizuar dhe çmimet e biletave janë më të larta.

Pavarësisht debateve, The Odyssey ka arritur tashmë diçka të rrallë: të krijojë zhurmë globale shumë kohë përpara se filmi të jetë gati për ekranin e madh.