Me afrimin e afatit kalimtar të dimrit, spekulimet për transferime mes klubeve të mëdha italiane po intensifikohen. Sipas raportimeve të fundit nga TuttoMercatoWeb, Juventusi dhe Milani po shqyrtojnë mundësinë e një marrëveshjeje shkëmbimi lojtarësh gjatë merkatos së janarit.

Milani është në kërkim të një mbrojtësi të ri dhe thuhet se trajneri Massimiliano Allegri e ka vendosur Federico Gattin, ish-protegun e tij te Juventusi, në krye të listës së dëshirave. Në anën tjetër, bardhezinjtë janë të interesuar për përforcimin e mesfushës, çka ka hapur diskutime për një shkëmbim të mundshëm që përfshin Samuele Riccin.

Megjithatë, kjo nuk është alternativa e vetme në tryezë. Për t’i hapur rrugë kalimit të Gattit te Milani, Juventusi po shqyrton edhe mundësinë e rikthimit të një ish-lojtari të vet – Koni De Winter, i cili aktualisht po has vështirësi për të siguruar minuta te kuqezinjtë.
Mbrojtësi i qendrës u transferua te Milani nga Genoa gjatë verës së kaluar për rreth 20 milionë euro, por ende nuk ka arritur të gjejë vazhdimësi. De Winter është produkt i akademisë së Juventusit dhe, nga pikëpamja e regjistrimit në skuadër dhe listën e Ligës së Kampionëve, përbën një opsion ideal për bardhezinjtë.

Bisedimet janë ende në fazë fillestare, por zhvillimet e ardhshme pritet të sjellin më shumë qartësi mbi këtë marrëveshje të mundshme mes dy gjigantëve të Serie A.