Aktori dhe muzikanti Johnny Depp ka themeluar shtëpinë e re muzikore IN.2 Records, në bashkëpunim me kompaninë britanike Cadiz Music. Labeli do të përfshijë një gamë të gjerë krijimesh artistike – nga albume origjinale dhe single, deri te kolonat zanore të filmave – të kuruara personalisht nga vetë Depp.

Sipas tij, qëllimi i IN.2 Records është të ruajë standardet më të larta të krijimtarisë artistike, ku çdo detaj, nga muzika te paketimi, do të reflektojë cilësi të jashtëzakonshme. Cadiz Music, me mbi 20 vite përvojë në industri, do të merret me prodhimin dhe shpërndarjen e publikimeve.

“IN.2 Records ka qenë një ëndërr e vjetër që tani po bëhet realitet,” tha Depp. “Ky projekt është një festë e artit dhe krijimtarisë – bashkëpunim me muzikantë të jashtëzakonshëm dhe zbulim i zërave të rinj. Kjo është vetëm fillimi.”

Publikimi i parë i labelit do të jetë kolona zanore e filmit të ri të Depp, Modigliani – Three Days on the Wing of Madness, që përfshin muzikë nga artistë si Tom Waits, Carla Morrison, The Tiger Lillies dhe The Velvet Underground & Nico, si dhe partiturën origjinale nga Sacha Puttnam.

Albumi do të dalë më 7 nëntor 2025, në format vinyl të dyfishtë, CD dhe digjital. IN.2 Records është pjesë e IN.2 Film Group, duke shënuar një hap të ri në bashkimin e pasioneve të Depp për filmin dhe muzikën.