Spanja, Venecia dhe Parisi janë vetëm disa prej vendeve ku këtë verë janë shënuar protesta të forta kundër turizmit masiv. Nga ndërprerja e një dasme miliarderësh në Venecia, tek mbyllja e muzeut Louvre në Paris, sinjalet janë të qarta: mbiturizmi është kthyer në një krizë serioze.

Noel Josephides, një veteran i industrisë së turizmit në Britani, thotë se këtë situatë e kishte paralajmëruar që në vitin 2013. Me shfaqjen e platformave si Airbnb dhe zgjerimin e kompanive low-cost, tregu u mbush me udhëtarë që kërkojnë pushime të lira, duke e shndërruar “sekretin turistik” të çdo destinacioni në një zonë të mbipopulluar.

Për banorët lokalë, pasojat janë të dukshme: çmime të rritura, mungesë banesash për shkak të qirave afatshkurtra, humbje e identitetit kulturor dhe ndjenja se qytetet e tyre nuk u përkasin më.

Shembuj si Palma në Spanjë tregojnë se disa qytete po përpiqen ta rimendojnë turizmin, duke vendosur kufizime mbi hotelet dhe apartamentet me qira, apo duke investuar në hapësira për komunitetin lokal. Por sfida mbetet e madhe: si të ruhet ekonomia e bazuar në turizëm, pa sakrifikuar cilësinë e jetës së qytetarëve?

Nëse dikur turizmi shihej si një bekim ekonomik, sot gjithnjë e më shumë po shihet si një thikë me dy tehe. Pyetja e madhe mbetet: kush e ka të drejtën për një qytet - banorët apo vizitorët?