Pas më shumë se një dekade, Netflix ka prezantuar për herë të parë një përditësim të madh të faqes kryesore në televizor. Platforma do të sjellë një dizajn më modern dhe funksional, duke zhvendosur menynë kryesore nga e majta në qendër të ekranit, me përshkrime më të thjeshtuara dhe rekomandime që përshtaten në kohë reale me shikimet dhe orarin e përdoruesit.

Ky ridizajnim synon ta bëjë navigimin më të lehtë dhe përmbajtjen më të personalizuar. Po ashtu, në faqe do të theksohen më shumë eventet live dhe lojërat, duke reflektuar ambiciet e reja të kompanisë për të zgjeruar ofertën përtej filmave dhe serialeve.

Krahas përditësimit vizual, Netflix ka njoftuar edhe teste të reja që përfshijnë një kërkim të avancuar me ndihmën e inteligjencës artificiale, ku përdoruesit mund të kërkojnë me fraza natyrale si “dua diçka argëtuese dhe të lehtë”. Po ashtu, shumë shpejt pritet të testohet edhe një feed vertikal për pajisjet mobile, i ngjashëm me TikTok, ku përdoruesit do të mund të shfletojnë klipe të shkurtra nga filmat dhe serialet e Netflix.

Këto ndryshime vijnë në një moment të rëndësishëm për kompaninë, vetëm pak ditë para prezantimit zyrtar të programacionit të ri për reklamuesit, duke treguar qartë se Netflix po synon të mbajë ritmin me trendet teknologjike dhe sjelljet e reja të shikuesve globalë.