Marka luksoze e Volkswagen, Audi, ka njoftuar se do të shkurtojë deri në 7,500 vende pune në Gjermani deri në vitin 2029, në përpjekje për të reduktuar kostot dhe për të lehtësuar kalimin drejt prodhimit të makinave elektrike.

Sipas kompanisë, ky plan, i cili është dakordësuar me përfaqësuesit e punonjësve, pritet të kursejë rreth 1 miliard euro në afat mesatar dhe të sjellë një investim prej 8 miliardë eurosh në fabrikat gjermane gjatë pesë viteve të ardhshme.

Audi e justifikoi këtë vendim duke përmendur presionin e madh konkurrues, pasigurinë politike dhe vështirësitë ekonomike në rritje. Shkurtimet përfaqësojnë rreth 8.6% të fuqisë punëtore globale të kompanisë.

Këto shkurtime vijnë në një kohë kur edhe kompania mëmë, Volkswagen, ka planifikuar mbi 35,000 largime deri në fund të dekadës, përballë konkurrencës së fortë nga prodhuesit kinezë të automjeteve elektrike dhe rënies së shitjeve. Po ashtu, një kërcënim tjetër për industrinë gjermane të makinave mbetet plani i Donald Trump për vendosjen e një tarife prej 25% për importet e automjeteve në SHBA, duke rritur ndjeshëm çmimin e tyre për konsumatorët amerikanë.