Konsumimi i kafe dhe çajit mund të lidhet me një rrezik më të ulët të kancerit të kokës dhe qafës, sugjeron një analizë e re.

Kanceri i kokës dhe qafës, që përfshin kanceret e gojës, faringut, larinksit, sinusve paranasal dhe hapësirës nazale, si dhe gjendrave të pështymës, është tipi i shtatë më i zakonshëm i kancerit. Sipas Observatorit Global të Kancerit, ka më shumë se 900,000 raste dhe mbi 400,000 vdekje çdo vit.

Një analizë e publikuar në revistën Cancer muajin e kaluar ka gjetur se pirja e më shumë se katër filxhanëve kafe çdo ditë lidhet me një rrezik më të ulët të këtij lloji kanceri.

Ajo që është më befasuese, sipas autorit kryesor të studimit, Yuan-Chin Amy Lee, është se edhe kafeja pa kafeinë ka pasur ndikime pozitive të ngjashme me ato të kafesë me kafeinë, duke sugjeruar se rezultatet mund të jenë të lidhura jo me kafeinën, por me komponimet e tjera në kafe, si polifenolët, të cilët janë antioksidantë.