Një sukses i rëndësishëm për Kosovën në fushën e shkencës dhe teknologjisë. Vehbi Terzi, nxënës i klasës së dhjetë në International Maarif Schools of Kosova, ka fituar vendin e parë në kategorinë e Shkencave Shoqërore, në Festivalin e 8-të Ndërkombëtar të Shkencës dhe Kulturës së Botës Turke, të mbajtur në Gaziantep të Turqisë. Ai u vlerësua për projektin e tij, Olric.ai, të zhvilluar nën mentorimin e mësimdhënësit Sylejman Ramadani. Festivali, i mbajtur nga 26 deri më 28 tetor, mblodhi pjesëmarrës nga 23 vende. Gjatë aktivitetit u ekspozuan 142 projekte, të përzgjedhura nga më shumë se një mijë aplikime. Përfaqësuesi i Fondacionit Turk Maarif në Kosovë e cilësoi këtë arritje si burim krenarie për shkollën dhe vendin, duke theksuar potencialin e të rinjve kosovarë në hulumtim dhe zhvillim shkencor.