Kolektivi për Mendim dhe Veprim Feminist ka bërë thirrje për protestë në Prishtinë, pas vrasjes së Arlinda Zekajt, duke kërkuar përgjegjësi institucionale dhe masa konkrete për mbrojtjen e grave nga dhuna.

Protesta është paralajmëruar për sot, në orën 16:00, në sheshin “Zahir Pajaziti”. Nga aty, protestuesit pritet të marshojnë drejt Ministrisë së Drejtësisë, Këshillit Prokurorial, Këshillit Gjyqësor, Policisë së Kosovës dhe Qeverisë.

Në reagimin e publikuar në Facebook, Kolektivi ka kritikuar institucionet për neglizhencën ndaj rasteve të dhunës në baza gjinore. Sipas organizatës, edhe vrasja e Zekajt ishte paralajmëruar nga vetë viktima, e cila kishte kërkuar ndihmë nga institucionet.

Kolektivi e ka cilësuar rastin si dëshmi të dështimit institucional në mbrojtjen e grave dhe ka kërkuar llogaridhënie për mënyrën se si trajtohen rastet e dhunës.

Organizata u ka bërë thirrje qytetarëve që t’i bashkohen protestës, duke kërkuar veprime konkrete që do të garantojnë sigurinë dhe jetën e grave në Kosovë.