Reperi amerikan Jay-Z raportohet se ka zgjedhur veten për të qenë protagonisti i spektaklit muzikor gjatë pushimit të Super Bowl 2027, që do të mbahet në shkurt në stadiumin SoFi, në Los Angeles. Sipas portalit Puck, reperi kishte shqyrtuar edhe emra të tjerë, përfshirë Miley Cyrus dhe Justin Bieber, por në fund mund të ketë vendosur të ngjitet vetë në skenë. Jay-Z, përmes kompanisë së tij Roc Nation, bashkëpunon me NFL-në që nga viti 2019 dhe ka luajtur rol të rëndësishëm në përzgjedhjen e artistëve si Rihanna, Usher, Kendrick Lamar dhe Bad Bunny. Deri më tani, lajmi nuk është konfirmuar zyrtarisht nga NFL-ja apo Roc Nation. Nëse konfirmohet, performanca do të përkojë me 30-vjetorin e albumit të tij debutues, Reasonable Doubt, dhe 25-vjetorin e albumit The Blueprint.