Reperi amerikan Sean “Diddy” Combs raportohet se ka kryer disa shkelje disiplinore gjatë qëndrimit në burg, ku po vuan një dënim prej 50 muajsh. Sipas mediave amerikane, dosja e tij përfshin incidente fizike me të burgosur të tjerë dhe shkelje të rregullave për përdorimin e telefonave celularë, të regjistruara gjatë vitit 2025. Për këto shkelje, reperi raportohet se ka humbur 41 ditë nga kreditë për sjellje të mirë, si dhe 400 ditë privilegje për blerje në dyqanin e burgut. Shkeljet e përsëritura mund të ndikojnë në klasifikimin e tij dhe mundësinë e transferimit në një institucion tjetër, por deri tani nuk është konfirmuar ndonjë transferim. Diddy po vuan dënimin në burgun federal FCI Fort Dix, në New Jersey, ndërsa data e parashikuar e lirimit është ndryshuar nga 21 janari në 2 mars të vitit 2028. Ai u dënua për dy akuza që lidhen me transportimin e personave me qëllim prostitucioni, ndërsa u shpall i pafajshëm për akuzat më të rënda për konspiracion kriminal dhe trafikim seksual.