Vizione të së ardhmes, drejtpërdrejt nga filmat e fantashkencës, po zhvillohen këto ditë në Kombet e Bashkuara, ku liderët botërorë po diskutojnë mbi kërcënimin — ose premtimin — të inteligjencës artificiale.

Sekretari i Përgjithshëm i OKB-së hapi ciklin e fjalimeve në Asamblenë e Përgjithshme duke kërkuar mbikëqyrje më të fortë të inteligjencës artificiale, i mbështetur nga një raport i ri shkencor i OKB-së që paralajmëron një rrezik të vogël, por real, dëmesh katastrofike dhe të pakthyeshme. "Le të vendosim që vendimet mbi jetën dhe vdekjen të mos i lihen kurrë makinerive. Robotët vrasës nuk duhet të kenë vend në të ardhmen tonë," u shpreh ai në fjalimin e tij lamtumirës drejtuar liderëve botërorë.

Më pak se një orë më vonë, Shtetet e Bashkuara refuzuan çdo përpjekje për të ndërtuar një skemë globaliste kontrolli mbi inteligjencën artificiale, duke propozuar që teknologjia të quhet zyrtarisht "superinteligjencë" në vend të "inteligjencë artificiale". U theksua se çdo teknologji e re sjell sfida dhe se kritikët e sotëm të inteligjencës artificiale janë të njëjtët që dikur paralajmëronin katastrofa nga ngrohja globale, që nuk u realizuan siç u parashikuan.

Në fakt, sipas të dhënave shkencore, bota nuk është ftohur, por është ngrohur me rreth 0.45 gradë Celsius në 12 vitet e fundit, ndërsa raportet e mëparshme të OKB-së nuk kishin parashikuar zhdukje njerëzimi, por rrezik në rritje nga motet ekstreme.

"As frikë e panevojshme, as mohim i rrezikut"

Ekspertë të fushës thonë se të dyja qasjet — përshkrimi i inteligjencës artificiale si "film fantashkence" nga njëra anë, dhe si "jo-problem" nga ana tjetër — nuk ndihmojnë. Sipas tyre, debati i vërtetë duhet të përqendrohet te mekanizmat konkretë që mund të sigurojnë kontroll mbi sisteme autonome dhe të fuqishme, jo te zgjedhja e "anëve".

Vende të tjera po ndjekin me kujdes garën teknologjike mes fuqive të mëdha botërore, ndërsa disa lidera evropianë e kanë lidhur çështjen edhe me mbrojtjen e fëmijëve, duke thënë se duhet të veprohet tani, para se pasojat të bëhen të pakthyeshme. Lidera të tjerë theksojnë se inteligjenca artificiale do të ndryshojë botën, potencialisht për mirë, por kërkon kontrolle të forta dhe bashkëpunim ndërkombëtar në vend të garës apo ngadalësimit të njëanshëm.

Britania e Madhe ka shprehur synimin për të vendosur "një grup të vetëm parimesh dhe standardesh globale" për inteligjencën artificiale, duke e bërë këtë çështje fokus kryesor gjatë presidencës së saj në G20 vitin e ardhshëm.

Takim i lartë në Këshillin e Sigurimit

Të mërkurën, Këshilli i Sigurimit të OKB-së pritet të diskutojë mundësinë e vendosjes së kontrolleve mbi teknologjinë e inteligjencës artificiale, në një takim ku do të marrin pjesë disa nga emrat më të mëdhenj të industrisë, përfshirë drejtues të kompanive kryesore botërore të inteligjencës artificiale, të cilët kohët e fundit kanë ngritur alarmin për nevojën e masave mbrojtëse.