Banka e Japonisë (BOJ) ka rritur normën bazë të interesit nga 1 në 1.25 për qind, duke e çuar atë në nivelin më të lartë që nga viti 1995.

Vendimi, i paralajmëruar dhe i pritshëm nga tregjet, shënon një tjetër hap të Japonisë drejt largimit nga politikat e normave jashtëzakonisht të ulëta të interesit, të cilat i ka ndjekur për dekada.

Rritja vjen në një periudhë kur ekonomia japoneze po përballet me inflacionin, dobësimin e jenit dhe tkurrjen e fuqisë punëtore. Çmimet më të larta të energjisë, të ndikuara nga ndërprerjet e furnizimeve përmes Ngushticës së Hormuzit, kanë shtuar presionet inflacioniste.

Sipas të dhënave të publikuara të premten, inflacioni bazë në Japoni u ngadalësua lehtë, nga 1.8 për qind në korrik në 1.7 për qind në gusht, por mbeti pranë objektivit prej 2 për qind të bankës qendrore.

Banka e Japonisë ka nisur rritjen e normave që nga viti 2024, kur norma ishte -0.1 për qind. Që atëherë, ajo i ka rritur normat gjashtë herë.

Rritja e normave të interesit zakonisht mund ta forcojë monedhën, pasi investimet në atë valutë bëhen më tërheqëse. Megjithatë, jeni japonez vazhdon të përballet me presion, ndërsa autoritetet kanë ndërhyrë më herët në treg për të frenuar dobësimin e tij.