Konsumimi i rregullt i drithërave integrale lidhet me një rrezik më të ulët për sëmundjet e zemrës, tensionin e lartë të gjakut, kolesterolin e lartë dhe diabetin e tipit 2.

Një analizë e re e dhjetëra studimeve ka shqyrtuar më në detaje ndikimin e drithërave integrale në shëndetin kardiovaskular dhe metabolik. Sipas gjetjeve, përfitimet mund të fillojnë me rreth 90 gramë në ditë, ose afërsisht tri porcione.

Kjo sasi mund të arrihet, për shembull, me dy feta bukë integrale dhe një tas me tërshërë. Studimi sugjeron se konsumimi i katër deri në gjashtë porcioneve në ditë mund të sjellë përfitime edhe më të mëdha.

Personat që konsumuan nga tri deri në gjashtë porcione drithërash integrale për periudha nga dy javë deri në dy vjet, patën përmirësime të vogla në disa tregues shëndetësorë, përfshirë kolesterolin, tensionin e gjakut, peshën dhe perimetrin e belit.

Megjithatë, ekspertët theksojnë se nuk mjafton thjesht të shtojmë më shumë ushqime me drithëra integrale në dietë. Rëndësi ka modeli i përgjithshëm i ushqyerjes.

Drithërat integrale përfshijnë ushqime si tërshëra, orizi kaf, buka integrale, quinoa, farro dhe kokoshkat. Ndërsa produktet e rafinuara, si buka dhe orizi i bardhë, humbin një pjesë të fibrave dhe lëndëve ushqyese gjatë përpunimit.

Ekspertët këshillojnë që, kur blejmë një produkt të etiketuar si “integral” ose “multidrithër”, të kontrollojmë listën e përbërësve. Përbërësi i parë duhet të jetë një drithë integral.

Pra, nuk bëhet fjalë për një ushqim “magjik”, por për një ndryshim të vogël që mund të jetë pjesë e një diete më të shëndetshme.