Fustani i zi i Princeshë Dianës, i njohur si “revenge dress”, do të dalë në ankand për herë të parë pas gati 30 vitesh. Fustani pritet të shitet për deri në 300 mijë dollarë.

Diana e veshi fustanin më 29 qershor 1994, në një mbrëmje kur bashkëshorti i saj i atëhershëm, tashmë Mbreti Charles III, pranoi publikisht se kishte qenë i pabesë.

Fustani i dizajnuar nga stilistja greke Christina Stambolian tërhoqi vëmendje të madhe, pasi Diana zgjodhi një veshje të zezë, të ngushtë dhe me shpatulla të zbuluara, duke sfiduar edhe disa nga normat tradicionale të veshjes mbretërore.

Ajo e kombinoi me taka të zeza, çantë të zezë, thonj të kuq dhe një varëse të veçantë me diamante dhe safir.

Fustani u shit për herë të fundit në vitin 1997, kur Diana nxori në ankand 79 veshje për të mbledhur fonde për bamirësi. Tani ai do të ekspozohet në Londër, Hong Kong dhe Gjenevë, para se të dalë në ankand në Nju Jork më 9 dhjetor.

Disa nga të ardhurat e shitjes do t'i dhurohen një organizate bamirësie të shëndetësisë në Skoci.