Robotë humanoide në linja prodhimi, modele AI që sfidojnë rivalët globalë dhe fabrika automjetesh elektrike me shpejtësi marramendëse po tërheqin një valë të re vizitorësh të huaj drejt Kinës. Investitorë dhe sipërmarrës po paguajnë mijëra dollarë për qasje të rrallë në fabrikat kineze, në kërkim të një vendi në rreshtin e parë të revolucionit të ardhshëm teknologjik.

Kjo valë pasqyron frikën në rritje për një "goditje kineze 2.0", ndërsa Perëndimi po përballet me mundësinë që Kina po merr përparësi në prodhimin e avancuar. "Njerëzit tani e shohin Kinën si objekt studimi, tendencë që s'ekzistonte pak vite më parë," thotë Robert Wu, drejtor i firmës Baiguan.

Sektori i turizmit industrial në Kinë gjeneroi 17.8 miliardë dollarë vitin e kaluar dhe parashikohet të kalojë 44.6 miliardë dollarë deri në 2029. Fabrika e Xiaomi-t për automjete elektrike ka pritur mbi 250,000 vizitorë që nga marsi 2024.

Shenzhen, qendra teknologjike jugore që përgatitet të presë forumin APEC në nëntor, mishëron më së miri këtë tendencë: numri i vizitorëve të huaj u rrit 70% vitin e kaluar, me mbi 5 milionë hyrje të regjistruara deri në gusht të këtij viti. "Nuk ka vend tjetër në botë që e integron teknologjinë kaq thellë në jetën e përditshme," thotë sipërmarrësi çek Jan Smejkal, banor i qytetit prej 11 vitesh.