Kompanitë që për vite me radhë kanë përdorur mijëra kompjuterë për të gjeneruar Bitcoin po i shfrytëzojnë tash këto pajisje dhe qendra të të dhënave për inteligjencë artificiale.

Minierat e Bitcoin-it kërkojnë sasi të mëdha energjie dhe pajisje të fuqishme kompjuterike. Megjithatë, shpërblimet nga minimi janë ulur, ndërsa Bitcoin ka kaluar nga niveli rekord prej rreth 124 mijë dollarësh në tetor 2025 në rreth 80 mijë dollarë.

Për këtë arsye, një numër kompanish po kalojnë nga minimi i kriptomonedhave drejt ofrimit të kapaciteteve kompjuterike për kompanitë e AI-së.

Kompanitë si Riot Platforms, Bitdeer, TerraWulf, Core Scientific dhe Hut 8 po investojnë gjithnjë e më shumë në këtë sektor. Riot Platforms, për shembull, ka nënshkruar një marrëveshje 20-vjeçare me vlerë 9 miliardë dollarë për ofrimin e kapaciteteve kompjuterike për Anthropic.

Ekspertët thonë se kompanitë e minimit kanë një avantazh, pasi tashmë kanë infrastrukturën, qendrat e të dhënave dhe përvojën për sigurimin e energjisë së lirë dhe menaxhimin e sistemeve të mëdha kompjuterike.

Megjithatë, transformimi ka kosto të lartë. Disa kompani janë detyruar të shesin edhe një pjesë të rezervave të tyre në Bitcoin për të financuar kalimin drejt AI-së.

Kështu, pajisjet që dikur punonin për të gjeneruar kriptomonedha po përdoren gjithnjë e më shumë për një tjetër industri në rritje: inteligjencën artificiale.