Një studim i ri ka gjetur se kufizimet ndaj automjeteve të vjetra dhe më ndotëse në Londër janë të lidhura ngushtë me përmirësimin e shëndetit të mushkërive te fëmijët.

Hulumtimi, i udhëhequr nga shkencëtarë të Queen Mary University of London, analizoi më shumë se 3,400 fëmijë të moshës 6 deri në 9 vjeç nga Londra dhe Lutoni, gjatë viteve 2018–2022.

Studiuesit vunë re se pas vendosjes së Ultra Low Emission Zone (ULEZ) në vitin 2019, mushkëritë e fëmijëve në Londër u zhvilluan më mirë. Në fillim të studimit, fëmijët në Londër kishin kapacitet më të ulët të mushkërive krahasuar me ata në Luton, ndërsa më vonë dallimi u zvogëlua.

Përqindja e fëmijëve me funksion të dëmtuar të mushkërive ra nga 14% në 9% në Londër, ndërsa në Luton nga 9% në 7%.

ULEZ kërkon pagesë prej 12.50 paundësh në ditë për automjetet që nuk përmbushin standardet e përcaktuara për emetimet. Zona fillimisht mbulonte pjesën qendrore të Londrës, ndërsa në vitin 2023 u zgjerua në pjesën më të madhe të kryeqytetit.

Megjithatë, studiuesit theksojnë se rezultatet tregojnë një lidhje mes përmirësimit të cilësisë së ajrit dhe shëndetit të mushkërive, por nuk dëshmojnë se ULEZ është shkaku i vetëm. Faktorë të tjerë, përfshirë ndryshimet gjatë pandemisë së COVID-19, mund të kenë ndikuar.

Studimi është publikuar në revistën shkencore The Lancet Public Health.