Ferrari i parë tërësisht elektrik, modeli Luce, është shitur për 40 milionë dollarë në një ankand bamirësie në Kaliforni, duke vendosur rekord për çmimin më të lartë të paguar për një veturë të re në ankand.

Modeli Luce është krijuar me kontributin e stilistit britanik të iPhone-it, Sir Jony Ive. Vetura ka një dizajn unik, pjesë të personalizuara, rrota speciale dhe frena të modifikuara.

Pavarësisht çmimit rekord, Luce pati kritika pas prezantimit në maj. Disa e akuzuan Ferrari-n se po largohej nga dizajni tradicional i markës, veçanërisht për shkak se vetura është elektrike dhe ka pesë ulëse.

Të gjitha të ardhurat nga ankandi do t’i dhurohen Fondacionit Ferrari për programe edukative. Identiteti i blerësit nuk është bërë i ditur.

Më parë, një Ferrari Daytona SP3 i personalizuar ishte shitur për 26 milionë dollarë në vitin 2025, duke vendosur atëherë rekord për një veturë të re të shitur në ankand.