Gati 30 vjet pas vrasjes së Tupac Shakur, hetimet kanë marrë një zhvillim të ri pak ditë para nisjes së gjyqit ndaj Duane “Keffe D” Davis, i akuzuar për organizimin e atentatit të vitit 1996 në Las Vegas. Davis mohon çdo përfshirje, ndërsa prokuroria vazhdon ta lidhë sulmin me rivalitetin mes grupeve të hip-hopit të Bregut Lindor dhe atij Perëndimor të SHBA-së.

Një dëshmi e re e paraqitur para jurisë së madhe sfidon versionin e deritanishëm, duke pretenduar se autori i të shtënave mund të ketë qenë Deandre “Big Dre” Smith dhe jo Orlando Anderson, siç besohej prej vitesh. Pavarësisht hetimeve të gjata, autoritetet ende nuk kanë gjetur automjetin dhe armën e përdorur në atentat, ndërsa procesi gjyqësor pritet të tregojë nëse provat e reja do të ndihmojnë në zbardhjen e një prej mistereve më të mëdha në historinë e muzikës moderne.