Një studim i grupit ndërkombëtar World Weather Attribution ka treguar se ndryshimet klimatike po intensifikojnë thatësirat në Evropë, duke rritur humbjen e lagështisë nga tokat, liqenet dhe lumenjtë.

Sipas studiuesve, shkaktari kryesor i kushteve të thata nuk janë vetëm reshjet e pakta, por temperaturat më të larta që po përshpejtojnë tharjen e tokës.

Këtë verë, disa vende evropiane po përballen me mungesë uji. Franca pritet të ketë një nga prodhimet më të ulëta të misrit në dekadat e fundit, ndërsa disa rajone në Rumani, Holandë dhe Greqi kanë marrë masa për kufizimin e përdorimit të ujit.

Studimi vlerëson se tokat jashtëzakonisht të thata janë bërë disa herë më të mundshme krahasuar me një botë pa ndikimin e ndryshimeve klimatike.

Ekspertët paralajmërojnë se edhe në zonat ku reshjet nuk kanë ndryshuar ndjeshëm, rreziku nga thatësirat mund të vazhdojë të rritet për shkak të temperaturave më të larta.