Një gjykatë amerikane ka hedhur poshtë një padi ndaj kompanisë Apple, ku ajo akuzohej se nuk kishte parandaluar përhapjen e materialeve të abuzimit seksual me fëmijë në shërbimin e saj iCloud.

Gjykatësi në Kaliforni vendosi në favor të Apple, duke argumentuar se aktualisht nuk ekziston një ligj që detyron kompanitë teknologjike të identifikojnë dhe raportojnë në mënyrë aktive përmbajtje të tilla.

Sipas vendimit, përgjegjësia për krijimin e rregullave të reja i takon ligjvënësve dhe jo gjykatave. Padia u rrëzua përfundimisht dhe nuk mund të paraqitet sërish.

Apple është kritikuar ndër vite për mënyrën se si menaxhon këtë çështje, edhe pse kompania ka theksuar vazhdimisht se mbrojtja e privatësisë dhe sigurisë së përdoruesve, veçanërisht e fëmijëve, është prioritet.

Vendimi ka rihapur gjithashtu debatin në SHBA për rregullat që mbrojnë platformat online nga përgjegjësia për përmbajtjet e publikuara nga përdoruesit.